05:03 م
الأحد 21 أغسطس 2022
كتبت- منال الجيوشي:
رثت والدة الفنان علي فايز، نجم برنامج “الدوم”، نجلها، عبر صفحتها الشخصية بموقع فيسبوك.
وكتبت: “ماذا بينك وبين الله يا قطعة من قلبي كنت دايما لوحدك بتكتب وتفكر وكنت بتقول ماليش أصحاب يا ماما طيب إزاي؟ قولي أفهمها دي إزاي؟”.
وتابعت: “طيب الآلاف من الشباب اللي زي الورد ولاد و بنات اللي كانوا معايا وحواليا وعنيهم كلها حزن وألم وحب ووفاء نابع من القلب وكل واحد فيهم مش عارف يعملي إيه عايزين يقدموا أي حاجة يشيلوني من على الأرض لو قدروا لأني أمك حتة منك دول كلهم إيه يا علي”.
وأضافت: “ولا إنت يا ابني اللي كنت مختلف وما كنتش لاقي اللي شبهك، إنسان مش من الزمن ده وعشت في زمن غير زمنك كان نفسك تحقق حلمك يا علي إنك تبقي مشهور وكنت كاتب فوق سريرك أنا بكره هبقى أكبر وأشهر ممثل في مصر، أديك بقيت تريند يا علي “.
واستكملت: “ربنا بيحبك أوي يا علي حقق لك كل اللي نفسك فيه وليلتك امبارح ما كانش عزاء دي كانت مظاهرة حب ووفاء نابعة من قلب كل الناس اللي جم إمبارح كنت بتقولي نفسي أموت قبلك يا ماما علشان انتي اللي بيتفتح لدعاءك باب السما وساعتها هدخل الجنة علطول ومن غير حساب وربنا حققلك أمنيتك”.
وتابعت: “كنت عايز تبقي مشهور وأديك بقيت تريند ومشهور يا علي كنت عايز تفتحلي باب الجنة وربنا حققلك طلبك يا علي وبصبري واحتسابي هدخل الجنة بسببك، وكنت عايز تروح لبابا ورحت يا سي علي مشيت يا علي مشيت يا علي وسبت قلبي فيه فراغ كبير أوي ولوعة وألم وحاجات كتير يعجز قلمي إنه يوصفها جزء كبير من روحي أخدته ومشيت يا حبيب قلبي بس عزائي إنك سعيد وفرحان وربنا راضي عنك يا حبيبي، وأثلج صدري لما شفتك وشفت وشك الجميل بقلب الأم اللي بتشعر بضناها إنت في مكان أحلى كتير من اللي احنا فيه”.
واختتمت حديثها قائلة: “طلبتها ونلتها يا أعز الناس ربنا يرحمك ويغفر لك و يعفو عنك ويجعل مثواك الجنة وألقاك لما ربنا يأذن وساعتها إنت اللي هتتشفعلي يا علي و تاخد بإيدي لباب الجنة، مع السلامة يا أول من رأت عيني مع السلامة يا أول فرحتي مع السلامة يا قطعة من الروح و القلب مع السلامة يا علي يا فنان يا جميل ونلتقي عند وجه كريم”.
وأعلن المخرج خالد جلال أمس وفاة الممثل علي فايز، أحد المتسابقين في برنامج “الدوم” لاكتشاف المواهب.