gtag('config', 'G-7WKYR7JNG2'); التخطي إلى المحتوى


10:21 م


الأحد 30 أكتوبر 2022

كتب- هاني صابر:

كشفت الفنانة وفاء سالم، عن تطورات حالتها الصحية بعد العملية الجراحية التي أجرتها وتسببت في حدوث تشوهات بوجهها، خلال ظهورها في فيديو عبر حسابها على صفحتها الشخصية بموقع “فيسبوك”.

وقالت وفاء، بالفيديو: “الحمد لله على كل حاجة بتحصل في حياتنا.. قبل العملية كنت نفسيًا مش مبسوطة، كان عندي محقون خد، وحقن في آثار العملية لسه موجودة ولسه فيه ورم”.

وتابعت: “شوفت وشوش بلاستيكية وعمري ما طلبتها، الإحساس بيقل ويخفت لما الإنسان ميبقاش على راحته وأنا عايزة ملامحي زي ما هي زي ما انتوا حبتوني، في أعمال قدمتها مكنتش راضية عنها، لأني مكنتش حاسة الإحساس الطبيعي، فبلاقي التعبير ضعيف وناقص”.

وأضافت: “لو ربنا قدر واشتغلت في الفن تاني، مبدورش أكون صغيرة، أنا في النهاية ماما وابني كبير وهو المخرج أدهم الشريف، مش بخبي عنه حاجة، لما عملت العملية ابني كان معايا خطوة بخطوة لو فيه حاجة غلط مكنش هيوافق، ابني ساعدني أتخطى مرحلة صعبة في حياتي”.

وكانت وفاء سالم، كشفت مؤخرا تفاصيل خضوعها لعملية جراحية تسببت في تشوهات في وجهها من قبل أطباء معروفين في مجال التجميل.

وقالت وفاء خلال مداخلة هاتفية مع الإعلامي عمرو أديب في برنامجه “الحكاية”: “أنا على مدار كذا سنة تعرضت لحقن وخيوط عند دكاترة كبيرة مشاهير، وكنت كل مرة أروح لدكتور على أساس يصلحلي غلط اللي قبله”.

وأضافت: “كل مرة كنت بتفرج على النتيجة، الاقي تشوهات في وشي، والناس كانت بتتكسف تقولي، حتى كان أدائي مضايقني جدا، إزاي كمملثة وأنا في تشوهات في وشي، لغاية إني وصلت لمرحلة، إني مش هروح لأي دكتور، لإني كل ما أروح لدكتور يقولي احنا مش هنقدر نعمل أي حاجة”.

وتابعت: “أنا دلوقتي بوري وشي لحضرتك من غير أي فلاتر ومن غير أي ميك أب، المناطق اللي في وشي أغلب الأساتذة قالولي مش هنقدر نتدخل لإنها مناطق أعصاب. لحد ما ربنا كرمني وقابلت دكتور س.غ، أنا ما كنتش فاهمة لما قابلته قالي احنا محتاجين نعمل إشاعة للمنطقة دي”.

وأكملت: “الدكتور عمل العملية وصورها لي فيديو، لقى إن الصديد واصل للشبكية وللمخ، الحمد لله ربنا انقذني، أنقذ حياتي، بعيدا عن إني همثل أو مش همثل، الحمد لله إنه أنا تجاوزت دا”.

وأردفت: “الصديد اللي حصلي كان من الحقن، وكان في خيوط جوا وشي، أنا تعرضت لطول الوقت لشكل من أشكال الابتزاز، وكان نفسي إن دا ما يحصلش”.

واستطردت: “أنا رجعت بنسبة كبيرة جدا لشكلي، رجعلي وفاء، أنا عايزة وفاء اللي الجمهور حبها”.

يذكر أن أخر أعمال الفنانة وفاء سالم مسلسل “القاتل الذي أحبني”، بطولة هاني رمزي، سهير رمزي، أحمد فؤاد سليم، محمد جمعة، ياسر فرج، رانيا منصور، تأليف صلاح عربي، إخراج عمرو عابدين.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *